MUNDEVUSE

Au jhor d'aneùt, a cha petit, lés idàies naciounalisces, "arachajhisces" putout (tén dun, ol ét bén mèu que de dire "séparatisces", nun jha ?), avanjhant obé se coéntant en Eùrope. de l'Ecoce a l'Oussétie, de la Cournoelle a l'Andalusie, de Madaere a la Lapounie.

Lés jhens cumprenant in petit meù qui que le sant pi voure que sant lours éntéràets, i periun sunjhàe. Bén vantàe bén, mé de l'àutre coutai, tot quéle masse de noveas "mélitans" enmene ac lai in grand nunbre de coulluns...

Daus jhens, qui velant faere la ménme chouse que fesant lés "états-naciun" (bén mau noumais), qu'avant la ménme prospéctive, ou putout lés ménmes idàies é détenceries, çhi sant vrae naciounalisce (jha den l'aeme dau mout) : ol ét a dire, dau jhens que velant a tot coutement avér ine "grande naciun", ac in mae de tiares poussiblle pr quéle lae.

Ol at lés aragounaes qui velant gardàe la Frenjhe de Fraga (obé de Pounant, obé core de Levant) maugrai que lés jhens lae lén le causant catalan, ol at lés Asturéns çhi velant jha vere l'oucident, la tiare de Eo-Navia, aprchai a la Galicie, aloure que lés jhens de l'endrét causiant galicién, o core lés brtuns çhi velant garanti le Paes-de-Raes... Daus éxemplles ol en a tot plléns...

Ol at beacop de munde que velant que chouse mae a la gàuche, mé çheù o pe se faere den le cuntésce daus états d'anèut.

Aloure s'ol ét jha pr chanjhàe réde lés chouses, pr qui dun faere tot quou rabat ?

Sen chanjhement de prfi, qués nasciounalisces serant jhusce daus petits Sarkozys locaus...   

digg it | del.icio.us